PUPUH PUCUNG BALI

Pupuh Pucung [Sapta Timira]

HUKUM PADALINGSA

4u

8u

6a

8i

4u

8a

1. Pêtêng pitu,

sapta timira kawuwus,

bacakan dursila,

 né twara nyandang lakonin,

 cêning hayu,

pirêngang jua apang mêlah.

2. Bacak malu

 ané madan pêtêng pitu,

 bêsik kasugihan,

dadua kapradnyanan cêning,

 patpat têlu,

kayowanan lan kagungan.

3. Listuhayu,

kasaktyan kawiryan pitu,

néjani tuturang,

laksanané bêsik-bêsik,

 tan rahayu,

réh singsal muda hidêpan.

PUPUH DURMA

Pupuh Durma

Hukum Padalingsa

12a

7i

6a

7a

8i

5a

7i

1. Pêlajahin cai maningkahang awak,

mamunyi pêlajahin,

ngadu sasêbêngan,

 sêmu wulaté nyênyêrang,

kêmikan bibihé manis,

 anggon mangalap,

trêsnan anaké ring cai.

2. Da mamotoh mamadat mangutang-ngutang,

makadi daya lêngit,

 solah apang mêlah,

mabanjar mapisaga,

êda mangulah piranti,

apang lascarya,

astiti bakti ring Widi.

3. Yan manyakap gawén pisaga di banjar,

êda mamêsu mulihin,

magawé sêkênang,

masawitra apang mêlah,

êda manuhunin rusit,

asih mabraya,

ênto anggon lima batis.

4. Singnya ada anak makuma pitrêsna,

 suka olas ring cai,

ênto êda mangêngsapang,

 têkéning pisukan anak,

rasa-rasayang di hati,

apang pasaja,

patuté anggon nasarin.

5. Da mamokak mêrêkak makuma bisa,

twi cai sadia ririh,

tau têkén daya,

 wicaksana tur pêradnyan,

 suka bungah nandang lêwih,

kanggoang banjar,

braya mitra sami asih.

6. Êda pati kêndêl bonggan nyungjung awak,

liyu hênu buin rasanin,

 liyat cara mbéda,

munyiné anggon dosa,

bungahé makada iri,

hidêp idusta,

ngupaya ngapét silib.

PUPUH PANGKUR BALI

Pupuh Pangkur

Hukum padelingsa

8a

10i

8u

8a

12u

8a

8i

1. Sami sêngka mamastiang,

 iwang patut jêlé mêlahé to sami,

yén alih sujatin ipun,

 sami ajak twara nawang,

 bênêh pêlih wiréh kahanané liyu,

 kitané pada malénan,

 dêmên liu akwéh ngêdêgin.

2. Subalang jani di manah,

 buka cêning malajah sanuné urip,

nika wênang nomêr satu,

 nanging pang satya dimanah,

 êda ganjih, né plajahin malu hitung,

apang da nuwut né iwang,

ngundukang bênêh né pasti.

3. Ila-ila ngaku bisa,

sada sumbung ngorahin ya kêma mai,

 kabatêk dêmên marêmbug,

nuturang déwéké pradnyan,

 dêmên ngorti, ngorahang iba kagugu,

sujatiné jalma bêngal,

 liwat pongah ngaku ririh.

4. Yan sujati anak wikan,

 twara pêrlu ngomongang awak padidi,

munyiné sing ngulah pêsu,

 munyi banban alon plapan,

 tangar manis, tata krama manut sulur,

 milpilang pangunadika,

ngawé lêga sang miragi.

5. Intip pari krama drêsta,

adigama déwagama da nulakin,

lampahé sikutang ditu,

ané suka klawan duka,

to pinêhin, yan hala mabukti lacur,

 yan patut mabukti mêlah,

 kéto jani ban minêhin.

PUPUH GINANTI BALI

PUPUH GINANTI

Hukum Padalingsa

8u

8i

8a

8i

8a

8i

1. Ampahé makarana bingung,

 sangkaning laksana pêlih,

 malês tur lêkig malajah,

 wêtu kiapé sasai,

 pêsu mulih ngutang lampah,

 tusing ada né kaalih

2. Gradag-grudug tanpa unduk,

madasar dêmên malali,

mangulahang ané gampang,

pajalané bingung paling,

ngalih galang nêmu halang,

twara bakat né kaapti.

3. Yaning têlêb sinah têpuk,

 dyastu ané sulit-sulit,

 tatujoné jantên sida,

pangalangé dadi lilih,

 madasar bahan upaya,

majalaran jêmêt rajin.

4. Jêmêtang jantên kapangguh,

 ingêtang da pêsan lali,

kabisané luwir sanjata,

né dadi prabotang sai,

 né anggén ngaruruh mêrta,

 sahênuné pada hurip